काठमाडौं।
पछिल्लो समय पूर्व र बहालवाला संस्कृति, नागरिक उड्डयन तथा पर्यटन मन्त्रीको जुहारी चलेको छ । दुवै जनाले एकले अर्कालाई आरोपप्रत्यारोप लगाइरहेका हुन् ।
यसैबीच, बहालवाला मन्त्री प्रेम आलेले आफूमाथि लागेको आरोप पुष्टि भए एक सेकेन्ड पनि पदमा नबस्ने घोषणा गरेका छन् । तत्कालिन मन्त्री योगेश भट्टराईले लगाएको आरोप निराधार भएको आलेको भनाई छ ।
आफूले काठ तस्करी गरेको भन्दै भट्टराईले एक अन्तर्वार्तामा लगाएको आरोप साँचो भए वा कुनै प्रमाण भेटिए आफू तत्कालै राजिनामा दिन तयार भएको उनको दाबी छ ।
आलेले भट्टराईमाथि माओवादी युद्ध चर्किदा खरखजानासहित २ नम्बरी गरेर अहिले काठमाण्डौमा घर बनाएको आरोप लगाएका छन् । ‘जतिबेला माओवादी युद्ध चर्किएको थियो । माओवादी साथीहरु भूमिगत हुनुहुन्थ्यो ।
सेना र माओवादीको बीचमा वार भइरहेको थियो । भट्टराई खरखजानासहित २ नम्बरी गर्नुहुन्थ्यो’, उनले भने । ‘उहाँ ताप्लेजुङबाट लुरुलुरु काठमाडौं आएको त हो नी । त्यही खरखजाना बेचेर काठमाडौंमा घर बनाउनु भएको छ।’
‘उहाँ त हतियार खरखजानाको तस्करी गर्नुहुन्थ्यो । हाम्रो पार्टीका आदर्णीय नेता पूर्व प्रधानमन्त्री माधव नेपाल प्रधानमन्त्री हुँदाखेरि उहाँ मातहतको मन्त्रीलाई तपाईंले काम गर्न सक्नु भएन भन्दाखेरि उहाँले तपाईं हतियारको तस्करी गर्ने भन्दाखेरि उहाँ चुप लाग्नु भयो ।’
मन्त्री आलेले भट्टराईले तातोपानी नाकाबाट हतियारको तस्करी गर्ने गरेको आरोप समेत लगाए । रोलेक्स घडी र रक्सीको बोतल बिदेशबाट ल्याएको भन्ने आरोप लागेका आलेले विमानस्थलमा रहेको सीसीटिभी चेक गर्न र सो कुरा प्रमाणित भए राजिनामा दिने बताएका छन् ।